ادب وتراث

نص شعري من مصر “خارج حدود عشقك “

محمد أحمد جمعة/ مصر

جرعة ألم جرعة
وجع جرعة شوق
وجرعة من وقتك
انا اللى صدقتك فحققتك حلم
شكلت بيكِ حروف الصمت
صدقت فيكِ الشك
وبشئ من التفصيل
وبشئ من الشعر
ياللى اعتبرتِ الشعر
مجرد حروف فى كلام
باسم اللى نورها بتوهبه للشمس
هاكتب سكوتى قصيدة
وبشخبطه ع الحيطة
هارسم ملامح واحدة
لسه ما اتخلقتش
خارج نطاق الوصف
وخارج حدود عشقك
إمتى الشعر يرتوى منك
فيصالحك لسان شعرى
فا أحبك من قبل ما أشوفك أو أعرفك حتى
وأشرب شعرك فيجرى الحب فى عروقى
واعدلك كان فيه قبلك كام خطوبة وماتمتش
وكام ألبوم صور لبنات حبيتنى وماهتمتش
وكام عروة قميص كنت ليها زرار ع الصدر
وكام قميص فتحت ايديا زرايره
وكام علامة فى جسمهم ليّا لمّا شفايفى لمستهم
يا اللى إنتى آخر علامات الجمال فيّا
يا أبجدية خلت للكلام معنى
مش شرط تبقى الشرط نفسه فى الرجوع
ومش شرط نتعاتب فيجرحنا الكلام
ولو لسه شايفة عشقى أقل من المفروض
فلتسمحيلى أشوفك حقيقة برّه الحلم
فالمسك فيّا فيقف تفكيرى عن التفكير
ويتبدل لون الحزن على شفايفك
ويتواعد حضنى مع حضنك
فأحاول اكتبك شعر أكتبنى
تقل الخطوة بينّا وما أقلّش
وأشوف صورتك اللى فى المدى جنبى
ويدوب رجوعنا يحصل فى غمضة عين


مقالات ذات صلة

اترك تعليقاً

زر الذهاب إلى الأعلى